倪匡 : 「你有冇返大陸玩呀？」

觀戰台 「你有冇返大陸玩呀？」

http://hk.apple.nextmedia.com/news/art/20120902/18006074

【倪匡　訪談】
問倪匡如何防止香港大陸化，他反問記者：「你有冇返大陸玩呀？（有呀。）咪係囉，邊個香港人未去過大陸吖，咁你咁鍾意返大陸做乜啫？唓！你根本當冇件事，當毛澤東統治冇件事，係呀風光好呀、食得好呀、住得好呀，咁鍾意去大陸玩，中國嚟統治你驚乜啫。」

香港人對國家感情複雜，國旗飄揚時打呵欠，看到六四燭光卻想到自己是中國人，聽到國民教育動肝火，北京奧運傳聖火又趕去夾道歡迎，倪匡罵香港人精神分裂不爭氣。

倪老大1957年偷渡來港後，就再也沒有踏足過大陸，當然也沒有申請回鄉證，最有資格對受過共產黨壓迫、今日卻擁抱中國的香港人罵得狠：「你麻木吖嘛根本係，對於獨裁同強權統治麻木呀，對政治一無所知嘅，中國人嘅民族性係咁㗎嘛，如果我講犀利啲嘅話，直情係冇血性、冇公義感，講起大陸個個講到眉飛色舞，係我呢啲人先咁頑固嘅啫。」

他說共產黨了解香港人最透徹，但香港人吃喝玩樂大過一切，莫名其妙。看到新界東北疑似被割讓，香港人無不感震驚，但倪匡一笑置之：「哈哈哈哈，你覺得中港兩地仲未融合嘅咩？我覺得已經融合咗㗎喇，而且香港人好鍾意㖭，幾多人去深圳按摩、去中山叫雞呀，融合得都唔知幾妥當㖭，仲使你驚嘅，你話係咪？香港同廣州有乜分別啫，家好多人去廣州生活囉、好多人去深圳生活囉、好多人去上海囉，你有乜唔同啫。仲要唔單只係啲好無知嘅基層巿民，啲高層中層有邊個唔去大陸啫？」

倪匡看穿香港人不敢也不會起革命：「幾百萬人全部上街反對共產黨，都得嘅，但係香港人唔會同你咁儍㗎嘛，香港人個個返大陸嘆世界都嚟唔切，香港人唔知幾鍾意共產黨！」

他的哈哈哈哈如寒風，哈到電話筒都結霜：「你一方面非常討厭共產黨，一方面又擁護共產黨，矛盾到離譜，你唔鍾意共產黨，唔會有呢啲行動（返大陸）㗎嘛，好似我咁，我喺外國長久居住，不過為咗私人原因返嚟香港，都唔知幾慚愧，幾乎冇面目見人，嗰啲人返大陸返到好似返自己屋企咁開心，你仲講乜反共啫？」

《蘋果》記者：張嘉雯 

倪匡 : 香港生Cancer不是外星人惹的禍

2012年09月01日

http://hk.apple.nextmedia.com/news/art/20120901/18005410

觀戰台

香港生Cancer　不是外星人惹的禍

【倪匡　訪談】

當奧運跨欄冠軍劉翔也不過是男配角時，誰能抽身於中共的遊戲？

1997年後的香港，一片歡樂歌舞昇平，人人北上賺人仔，按摩叫雞娶老婆，總之祖國遍地黃金無限好，移了民的執輸呻笨。上海的IFC與中環的IFC一對雙生兒，都是中國騰飛的重要場景，要不是連不上facebook和不知道李旺陽是誰，大家生活如常無知無覺，以為一切是外星人惹的禍，其實沒有錯，如果外星人的中文名叫「中國共產黨」的話。

「西環治港，早就開始㗎喇，唔係家開始㗎，1997年7月1號之後已經開始，呢個地方一交得畀共產黨，一定係共產黨嚟治㗎嘛，你以為佢會畀你治呀？香港人家至警覺？」情況會在梁振英上場後加劇嗎？「我估佢都唔知自己做緊乜，共產黨有一整套計劃，佢只係實際喺度執行，邊個做係冇分別，都係共產黨嘅意思，唔通聽老百姓嘅意思咩！」

倪老大深信共產黨控制香港的計劃在數十年前已經開展，共產黨員遍佈各個行業、各個部門，「多到不得了呀，滲透咗每一個角落，都唔知佢數唔數到出嚟，係你香港人唔理之嘛，哈哈哈，商界、政界又有，軍界又有，全部已經滲透得好犀利，你哋唔知道共產黨組織嘅嚴密，仲以為香港一國兩制？」

問一國兩制是否已經消失，倪匡覺得記者無聊，「我從來冇相信過一國兩制㗎，只係香港好多人天真相信啫，冇可能㗎，三十幾年前訪問我，我已經話我根本唔相信，共產黨嘅話都信得過嘅？豬乸都會上樹啦，哈哈哈。」

共產黨對香港的控制，在倪老大眼中早是一國一制，「或者明或者暗，共產黨嘅組織非常龐大，係恐怖到極點嘅一個組織嚟㗎，佢控制呢個地方已經控制到好透澈喇，家不過慢慢浮上面之嘛，個事實已經係咁㗎啦，係香港人自己唔知道，由回歸之前到家已經妥當晒，逐步逐步實施之嘛，有23條同冇23條有咩唔同啫？」

如果用癌症來比喻，香港算是哪一期？「至少係中期啦，80年代嘅時候我都講過，話50年不變，轉頭就變啦，香港跟住大陸走，越走越腐敗，自由空間收窄，呢啲係一定要嚟㗎，嘻嘻嘻嘻，已經算係收窄得好慢㗎喇，做咩都冇作用，自從回歸已經定咗。」

曾蔭權貪盡海陸空，香港人啞然，倪老大又笑，「呢啲小兒科到極點，小巫見大巫，佢家貪小便宜，小到不值一提，香港透明度高，一定會被翻出嚟，你諗吓谷開來幾十億英鎊咁貪番嚟，大陸叫啲官員公佈財產，佢夠膽叫老百姓公佈先，真係滑稽、匪夷所思，太糊塗！」

香港因為有傳媒、有制度、有廉署，倪匡覺得氣數未盡，「所有人民政府講嘅話都冇人信，人民對佢一啲信任都冇，但喺香港就算集體反抗唔可以，個人反抗係可以，個人表達同共產黨不合作，可以拖延吓死亡，好似癌症末期咁，搵個神醫拖延吓。」

其中一種拖延方式，倪匡特別提到近日的反國民教育運動，「嗰班後生仔女（學民思潮）就好出色，完全冇乜妥協嘅意思，反而好過成年人囉，嗰啲冇乜顧慮㗎嘛，咁先可以拖延到㗎嘛。」他支持所有抗共的行動，「咩都要有行動㗎嘛，我都主張有行動㗎，罷課對共產黨嚟講當然絕對係忌諱，我又唔相信香港人可以做得到罷課呢一點，關於國民教育呢件事，只能靠教員嘅良心做事。」

至於他自己，則只能發發牢騷，「或者上網陰陽怪氣講幾句，不過我個微博都俾佢刪咗，控制到不能想像，80幾萬網警，冇辦法，香港人就只能夠等個大局面變，小局面變唔出啲乜嘢嚟，只可以盡量拖延。」

《蘋果》記者：張嘉雯